فوتو: egemen.kz
9 ءساۋىر كۇنى مەملەكەت باسشىسى سۋ سالاسىنداعى ىرگەلى قۇجات جاڭا سۋ كودەكسىنە قول قويدى. كودەكس ەلىمىزدىڭ تۇراقتى ەكونوميكالىق دامۋىن قامتاماسىز ەتۋگە, حالىقتىڭ ءومىر ءسۇرۋ ساپاسىن ارتتىرۋعا جانە قورشاعان ورتانى قورعاۋعا ىقپال ەتەتىن, سۋدى قاۋىپسىز ءارى ءتيىمدى پايدالانۋ دەڭگەيىنە قول جەتكىزۋگە جانە ونى تۇراقتى تۇردە قولداۋعا مۇمكىندىك بەرەدى. وسى قاتاردا «سۋ رەسۋرستارىن باسقارۋ جۇيەسىن 2030 جىلعا دەيىن دامىتۋ تۇجىرىمداماسى», «2028 جىلعا دەيىن سۋ شارۋاشىلىعىن دامىتۋدىڭ كەشەندى جوسپارى» جانە «2026 جىلعا دەيىنگى سۋدى ۇنەمدەۋ جونىندەگى جول كارتاسى» سىندى سۋ شارۋاشىلىعى سالاسىنداعى باسىمدىقتاردى ايقىندايتىن نەگىزگى ستراتەگيالىق قۇجاتتار دا بار.
مينيستر بايانداماسىندا سۋ شارۋاشىلىعىن دامىتۋدىڭ كەشەندى جوسپارىندا 160 ناقتى ءىس-شارا قامتىلعانىن اتاپ ءوتتى. بۇل جوبالاردى ءتيىمدى ىسكە اسىرۋ جانە باقىلاۋ ماقساتىندا سالالىق مينيسترلىك جوبالىق باسقارۋ تەتىكتەرىن ەنگىزگەن. سونداي-اق, ارنايى جوبالىق وفيس قۇرىلىپ, وڭىرلىك دەڭگەيدە تۇراقتى بايلانىس ورناتىلعان.
«بيىل بيۋدجەت قاراجاتى مەن حالىقارالىق قارجى ۇيىمدارىنىڭ (بۇكىلالەمدىك, يسلام جانە ەۋروپالىق بانكتەر) قاراجاتى ەسەبىنەن 6 مىڭنان استام شاقىرىمدى قۇرايتىن 1485 كانال قايتا جاڭعىرتىلىپ جاتىر. ونىڭ ىشىندە 2025 جىلى ەكى ءجۇز مىڭعا جۋىق گەكتار جۇكتەلگەن اۋماعىمەن مىڭ شاقىرىمعا جۋىق (962 كم) 275 كانال پايدالانۋعا بەرىلەدى دەپ جوسپارلانىپ وتىر», دەدى نۇرجان نۇرجىگىتوۆ.
2021–2025 جىلدار ارالىعىندا شامامەن جەتى مىڭ شاقىرىم يرريگاتسيالىق كانال جاڭعىرتىلادى.
ايتا كەتەيىك, 2021-2024 جىلدار ارالىعىندا 8577 يرريگاتسيالىق كانالدىڭ (47 مىڭ كم-دەن استام) 884-ىنە (5406 كم) كۇردەلى جوندەۋ جانە رەكونسترۋكتسيالاۋ جۇمىستارى جۇرگىزىلگەن. بىلتىر 162 كانالدى (778,3 كم) رەكونسترۋكتسيالاۋ اياقتالعان.
